لێرە دەتوانن سوودمەندبن لە زانیاریی سەبارەت بە یاریە ئەلیکترۆنییەکان و تەکنۆلۆجیای سەردەم. هەروەها دروستکردنی کۆمپیوتەر و ڕاژەکانی کۆمپیوتەر.
ساڵانێکی زۆر پێش دامەزراندنی کوردکاست، سەرقاڵی یارییە ئەلیکترۆنییەکان بووین. ساڵی 2012 گەورەترین کەناڵی کوردیمان بەڕێوەدەبرد بۆ یارییە ئەلیکترۆنییەکان بە زمانی ئینگلیزی. ساڵی 2014 یەکەمین ڤڵۆگمان بڵاوکردەوە. پاشان لە ساڵی 2016 دەستمانکرد بە دروستکردنی کەناڵ و ستۆدیۆی کوردکاست، بۆ پەخشکردنی یارییە ئەلیکترۆنییەکان بە زمانی کوردی. ساڵی 2017 یەکەمین ڤیدیۆی دروستکردنی کۆمپیوتەرمان بڵاوکردەوە. هەر لەو ساڵەدا زیاتر لە 48 بۆنە (Event) ڕێکخراون و زیاتر لە 7000$ پێشکەشی براوەکان کراون، هەروەها زیاتر لە 12000$ کۆکراوەتەوە بۆ پڕۆژەی خێرخوازی. هەم ڤیدیۆی یارییەکان و هەم ڤیدیۆی دروستکردنی کۆمپیوتەر، بە باشترین شێوە دروستکراون و پەخشکراون، جگە لەوەی ویستوومانە سوودی هەبێت بۆ بینەران، هەوڵمان داوە چێژبەخش بن. ئێستا ژمارەی بەشداربووانی کەناڵی کوردکاست لە یوتیوب لە 143 هەزار کەس تێپەڕیووە. ساڵی 2017 دەستمانکرد بە نووسینی بیرۆکە و پڕۆژەیەک بەناوی (کۆمپیوتەرەکەت بناسە) کە ئامانجمان لەم پڕۆژەیە ئەوەبوو بتوانین بەشێوەیەکی زانستیی و بە زمانی کوردی سەرجەم پارچەکانی کۆمپیوتەر بناسێنین. بۆ ئەوەی هەموو کەسێک شارەزاییی تەواوی هەبێت لەوەی کۆمپیوتەر ئەو ئامێرە گرنگەی ڕۆژانە سەرجەم کارەکانمان بەهۆیەوە ئەنجام دەدەین چۆن کار دەکات؟ هەروەها بزانن چۆن کۆمپیوتەرێک دەبەسترێت و ڕەقەواڵە (Hardware)ەکان چۆن پێکەوە کار دەکەن. زنجیرەکە پێویستی بە کارکردنی بەردەوام هەبوو بۆ زیاتر لە شەش مانگ و بڕی 5000$ کۆکرایەوە.
کوردکاست بە تەنیا کەناڵێکی یوتیوب نەبووە لەم ساڵانەدا. بەڵکو گۆڕانکارییی گەورەی کردووە لە شێوازی یاریکردن، تێڕوانین و بیرکردنەوەی خەڵکیی بۆ یاریکردن. بۆ نموونە پێش کوردکاست لە ناو یاریکەراندا باو نەبوو گرنگیی بە کۆمپیوتەر بدرێت، هەروەها هیچ شوێنێکیش نەبوو کە پیشەی سەرەکییان بریتی بێت لە دروستکردنی کۆمپیوتەر. بەڵام دوای کوردکاست و ناوەڕۆکەکانی، ئەمانە هەمووی گۆڕدران، ئێستا جگە لەوەی گرنگییەکی زۆر بە کۆمپیوتەر دەدرێت، چەندین پێشانگا و کۆمپانیاش دروستبوون بۆ ئەو بوارە. هەروەها کوردکاست بە تەنیا کاریگەریی لەسەر کۆمەڵگای یاریکردن نەبوو، بەڵکو لەم ساڵانەدا چەندین کۆمپیوتەر دروستکراون بۆ کۆمپانیا و کەسانی سەربەخۆ بۆ بوارەکانی (گرافیک دیزاین، بەرهەمهێنانی ڤیدیۆ و ئەندازیاریی و هتد)
ئێمە جگە لەوەی ویستوومانە سەرجەم ئەو ناوەڕۆکانەی بڵاویان دەکەینەوە زانستیی و دروستبن، بۆ ئەوەی تەنیا ژمارەی بینەران و بەشداربووان زیاد نەکەین، بەڵکو زانست بگەیەنین و گۆڕانکارییش لە بیرکردنەوەی کۆمەڵگەدا بکەین، چیتر یاریکردن تەنیا بۆ منداڵان نییە و حەز و خولیایەکە بۆ هەمووان بەبێ جیاوازیی تەمەن، ڕەگەز و هتد. ئەگەرچی لە وڵات و کۆمەڵگەکانی تر زۆر لە مێژە ئەوە چەسپیووە، بەڵام لای ئێمە حەز و خولیایەکی نامۆ بووە. چۆن دەبێت دوای تێپەڕبوونی تەمەنی منداڵیی کەسێک یارییە ئەلیکترۆنییەکان بکات؟! بەڵام ئێستای یوتیوبی کوردی و پەخشکردنی ناوەڕۆکەکان ئەوە دەردەخەن کە ئەو بیرکردنەوەیە هێدی هێدی بەرەو نەمان دەچێت و ئەوەش جێگەی خۆشحاڵییە بۆ ئێمە.
لە سەرکەوتنی کوردکاستدا دەبێت سوپاسی پشتگیرییکەران (Sponsors) و بەخشەرەکانمان (Donors) بکەین. چیتر بەخشینی دارایی بۆ پشتگیریکردن و بەردەوامییدان بەو پڕۆژەیەی خۆشت دەوێت و دەتەوێت سەرکەوتووبێت شتێکی نامۆ نییە و هەمووان لە ناو کۆمەڵگەکەماندا بیرکردنەوەیان بۆی گۆڕدراوە.